PVET, naiget nga agtrabtrabaho para iti pannakaisubli nga ASF free ti Ilocos Norte

Umabot iti dua gasut limapulo ket walo a kakailian ti kaduan a nabenipisiaran iti panangitultuloy ti gobierno probinsial a mangtulong kadagiti kakailian a mangpaadu kadagiti taraken a baboy ditoy probinsia.

Segun ken ni Provincial Veterinarian Dr.Loida Valenzuela karaman ditoy dagiti agtartaraken ti baboy a naapektaran dagiti tarakenda a baboy ti African Swine Fever wenno ASF itay kallabes ken dagiti sumagmamano a kakailian a nagkiddaw ti taraknenda iti babaen ti Agri Ka Dito program.

Imbatadna a sanga gasut walo pulo ket maysa dagiti benepisiario a naapektaran ti ASF dagiti tarakenda a baboy itay kallabes ken pitopulo ket pito a nagkiddaw ti taraknen da iti Agri Ka Dito.

Inbunannagna a dagiti benepisiario ket manipud iti nadumaduma a barangay ti siudad ti Batac.

Inlawlawagna a malaksid iti burias a naipaay kadagiti maseknan ket naikkan pay dagitoy ti sagsasangasako a feeds ken bitamina. 

Inpagunamgunam ni Valenzuela ti panangisigurado dagiti maseknan iti kinadalus dagiti ubong dagitoy ken masapul a mamantener ti sanitasyon iti aglawlaw pakairmanan ti saan a panangipalubos ti iyaasideg ti asino man iti ayan dagiti taraken dagitoy.

Inlawlawag ni Valenzuela a dagiti maiyun-una a maipaayan iti taraknen a baboy ket dagiti rehistrado iti Registry System for the Basic Sectors in Agriculture wenno RSBSA.  

Pinasingkedanna ti rakurak ni Gob. Matthew Marcos Manotoc a babaen iti panagtitinnulong ti tunggal maysa ket manamnama a matun-uyan ti kalikagum ti probinsia a panagbalin ti Ilocos Norte nga ASF free.

Nupay kasta, inannugotna nga adu pay dagiti proseso a rumbeng a pagdalanan sakbay a naan-anay a madeklarar nga ASF free ti probinsia.

Kabayatanna, immun-una ngem iti daytoy, umabot met iti sanga gasut limapulo ket maysa a burias, feeds ken bitamina ti naipaay kadagiti kakailian iti siudad ti Laoag.