CAM, ikalikagumna ti nadaldalus, naberberde ken nasalsalun-at nga Ilocos Norte

Pursigido ti agdama a Bise Gobernador Cecilia Araneta Marcos a mangitultuloy kadagiti ar-aramidenna a tignay para iti pannakasaluad ti aglawlaw.

Kaudian nga insayangkatna nga aktibidad ti “coastal clean-up” (panagdalus iti igid ti baybay) ken “mangrove planting” (panagmula ti bakawan) iti ili ti Currimao.

Mainaig iti daytoy, naammoan nga umabot iti tallopulo ket dua (32) a sako ti basura ti naukkon iti naisayangkat a panagdalus iti igid ti baybay.

Nakitimpuyog iti nasao a tignay dagiti nadumaduma nga ahensia ti gobierno kas iti Philippine Coastguard, Philippine National Police, iti panangidaulo ni Police Col Frederick Obar, Philippine Air Force Reservist, ti Environment and Natural Resources Office ti Provincial Government of Ilocos Norte, ken ti Local Government Unit ti Currimao.

Nakidanggay pay dagiti sumagmamano a pribado a kompania kas iti Mirae Asia, Terra Norte, NAMCO ken Sutherland.

Kabayatanna, umab-abot met iti sanga ribu sanga gasut a bakawan ti naimula iti tulong dagiti nasao a grupo.

Mangnamnamani Cecilia Marcos a babaen kadagiti isaysayangkatna a tignay ket maipasdek ti nadaldalus, naberberde ken nasalsalun-at nga Ilocos Norte para iti agdama ken iti sumarsaruno a henerasyon.