Benepisiario ti REAP iti “1st quarter”, maawatdan ti tulong ti PGIN kadakuada iti masungad a lawas

Maawaten dagiti benepisiario ti Review and Examination Assistance Program wenno REAP ti tulong pinansial nga ipaay ti Provincial Government of Ilocos Norte wenno PGIN.

Segun ken ni Mr. Willie Jake Sib-at, Ilocos Norte Youth Development Officer ken Officer In-charge ti Provincial Education Office, maiyawat ti nasao a tulong intono malem no Marso 24 iti auditorium ti kapitolio probinsial.

Inlawlawagna a sanga gasut sangapulo ket siyam dagiti benepisiario a nageksamen wenno ageksamen pay laeng ti licensure examination iti daytoy umuna a tallo a bulan ti tawen kas iti Criminologist Licensure Examination, Licensure Examination for Teachers ken ti Licensure Examination for Mechanical Engineering.

Imbatadna a kaaddoan kadagiti nasao a benepisiario ti nageksamen ti Criminologist Licensure Examination itay napalabas a bulan ti Pebrero.

Inbunannag ni Sib-at nga agpapada dagiti benepisiario nga umawat ti uppat a ribu a pisos a tulong manipud iti PGIN.

Kabayatanna, inpakaammona a kalpasan a maipaay ti tulong para kadagiti dimmalan ti licensure examination iti umuna a tallo a bulan ita a tawen ket agawat manen dagitoy ti aplikasyon para kadagiti mangala ti licensure examination iti “second quarter” wenno iti bulan ti Abril, Mayo ken Hunio.