50 a doctor a nagturpos idiay UERM, nangisayangkat ti medical mission ditoy probinsia 

Agpaut iti uneg ti dua nga aldaw ti medical mission nga isaysayangkat ti The Good Hope Future Foundation ken ti SinagTala Medical Association ditoy Ilocos Norte.

Segun ken ni Dr. Medeldorf Gaoat, chairman ti committee on health ti Sang. Panlalawigan, nakikoordinar dagitoy kada Gob. Matthew Marcos Manotoc ken ni Vice Gov. Cecilia Araneta Marcos iti nasapa a paset ti agdama a tawen.

Imbatadna a dagiti nasao a grupo ket nagturpos iti University of the East Ramon Magsaysay wenno UERM.

Kunana a napalaus ti yaman ken ragsak ti gobernador ta ti Ilocos Norte ti napili dagitoy a pangisayangkatan ti medical mission a nangrugi ita nga aldaw ken agpatingga intono bigat.

Inlawlawagna a saan laeng a minor operation ti naisayangkat ngem adda pay dagiti major operations.

Impalgakna a nasursurok ngem limapulo dagiti simmangpet a pakairamanan dagiti doctor, nurses ken dadduma pay a personnel ken sumagmamano kadakuada ti agtrabtrabaho iti sabali a pagilian.

Inbunannagna a naisayangkat ti pre-screening itay napalabas a bulan ti Pebrero kadagiti dimmalan iti operasyon.

Imbatadna a karaman kadagiti naisayangkat a libre nga operasyon ti “thyroidectomy, open cholecystectomy, laparoscopic cholecystectomy, herniotomy, hydrocoele repair, hernioplasty with mesh, hemorrhoidectomy, lumpectomy” ken dadduma pay. 

Malaksid kadagiti nadakamat nga operasyon ket naruay dagiti nagpaeksamen ti matada.

Kabayatanna, naammoan nga adda ti nakalista a naipadalan iti pre-screening a benepisiario ti major operations nga uppat a pulo.

Inpanamnama ni Gaoat a no adu dagiti saan a mataming a kailain iti daytoy agdua nga aldaw a kaadda ti nasao a grupo ditoy probinsia ket mabalin a kiddawen ti probinsia ti panagsubli dagitoy para iti maikadua a bansada a panangisayangkat dagitoy ti medical mission ditoy Ilocos Norte.