PGIN, tumulong a mangisigurado a maaddaan dagiti kompania kadagiti mapangnamnamaan nga empleado

Prayoridad ti gobierno probinsial no kasano ti mangpataud ti pagtrabahoan para kadagiti kakailian.

Daytoy ti inpakaammo ni Gob. Matthew Marcos Manotoc iti pannakaisayangkat ti “Revitalizing Talent Management for Workplace Sustainability Seminar” nga inatendaran dagiti employer manipud iti nadumaduma a sector ditoy probinsia.

Malaksid iti daytoy, inbunannagna a nakasentro ti imatang ti gobierno probinsial iti panagawis kadagiti baro nga agpupuunan ken baro a negosio.

Nupay kasta, impalgak ti gobernador a bigbigbigen ti gobierno probinsial a masapul a masaluadan dagiti agdama a negosio ditoy probinsia.

Mainaig iti daytoy, kunana a sindadaan ti gobierno probinsial a mangtulong kadagitoy tapno masigurado ti napintas a panagannayas dagitoy a negosio ken dakkel ti mapastrekda.

Inlawlawagna a babaen iti daytoy ket ad-adu pay a kakailian ti maakomodar dagitoy nga agtrabaho kadagiti iwanwanwanda a negosio nangnangruna kadagitoy nga alisto a mauma dagiti millennials gapu iti kinangato ti namnamaen dagitoy kadagiti pagserkanda a trabaho.

Inannugot ti gobernador a daytoy ket saan laeng a problema dagiti kompania ngem parikut ti tunggal maysa.

Pakaseknan daytoy, ginutigotna dagiti employer a mangiparikna dagiti empleado dagitoy nga adda ti kaimudinganda iti kompaniada.

Segun ken ni Gob. Marcos Manotoc, kalikagum ti gobierno probinsia ti makibinnulig kadagiti pribado a kompania tapno masigurado a napintas ti relasyon ti tunggal maysa ken napinpintas met laeng ti panagannayas ti negosio dagitoy.

Impasiguradona a tumulong ti gobierno probinsial iti naan-anay a pannakasanay dagiti empleado tapno mapagbalin dagitoy a mapangnamnamaan.