Mapaglaklakoan iti BuyIN Sunday market, umad-ado

Umad-ado ti mapaglaklakoan dagiti makiparpartisipar iti BuyIN Sunday market a maisaysayangkat iti sangoanan ti kapitolio probinsial.

Segun kenni Mrs. Elma Gabriel, mangidadaulo iti Micro Small and Medium Enterprise Office ti gobierno, daytoy ti pakaragragsakan dagiti babassit a negosiante ken mannalon a makiparpartisipar iti nasao a programa.

Inlawlawagna a pinasingkedan dagiti maseknan a dakkel ti maitultulong ti BuyIN Sunday market iti ibabangon dagitoy manipud iti nagpasaran a perdision a ginubuay ti pandemia nga insangbay ti COVID-19.

Kinuna pay ni Gabriel a kas iti Producer to Consumer Program, mabalin dagiti interesado a mannalon, dagiti aglaklako ti nateng ken prutas a makipaset iti BuyIN market babaen iti panagparehistro dagitoy iti MSME Office ti gobierno probinsial. 

Innayonna a babaen iti daytoy ket maragpatti napinget a kalikagum ni Gob. Matthew J. Marcos Manotoc nga ad-adu pay a babassit a negosiante ken mannalon dagiti matulongan a makabangon iti nagpasaran a rigat a ginubuay ti pandemia.