Dragon boat festival, agpaut iti tallo nga aldaw

Malukatan intono bigat ti Paoay Lake Dragon Boat Festival iti Paoay Lake Water Park iti Brgy. Suba ti ili a Paoay.

Naammoan a daytoyen ti maikatlo a gundaway a pannakaisayangkat ti nasao nga aktibidad.

Naituding nga agpaut ti nasao a festival iti uneg ti tallo nga aldaw kas paset iti panagfiesta ti nadakamat nga ili wenno agngudo intono Abril 30.

Manamnama a mangipaay ni Gob. Matthew Marcos Manotoc ti “inspirational message” kadagiti makipaset iti nadakamat nga aktibidad.

Napili ti gobierno munisipal a kangrunaan a sangaili ken agsarita iti daytoy a pannakalukat ti dragon boat festival ni Consul Ren Faqiang a head of post ken consul ti Consulate of the Peoples Republic of China iti siudad ti Laoag.

Immun-una ngem iti daytoy, nairakurak a naawis dagiti atleta ti dragon boat a kameng ti national team a taga Paoay a makipaset iti nasao nga aktibidad.

Nupay kasta, saan pay a napasingkedan no nakasangpet dagiti nadakamat nga atleta para iti ad-adda pay a panagbalin a nangayed ti dragon boat festival ita a tawen.