Tuzon, makikompitensia  iti 32nd SEA Games 

Nakadanonen idiay Cambodia ni Mr. Joaquin Dominic M. Tuzon, agtawen iti 20 a taga Brgy 25 iti siudad ti Laoag a karaman iti Taekwondo National Team a makisali para iti 32nd South East Asian Games a nangrugi idi Mayo singko ken agpatingga intono Mayo 17.

Agdama nga agad-adal idiay Ateneo de Manila University ni Mr. Tuzon a maysa a mangbukbukel iti Taekwondo National Team.

Mainaig iti daytoy, nagpanawagan ni Gob. Matthew Marcos Manotoc iti naan-anay a suporta dagiti Ilokano babaen iti sangsangkamaysa a panangikarkararag nga agballaigi daytoy iti nadakamat a kompetision.

Immun-una ngem iti daytoy, inlawlawag ni Mrs. Anna Mina Tuzon nga ina ti nadakamat nga atleta nga ubing pay idi inyam-ammo kenkuana ni Mr. Patrick Dominic Tuzon nga ama na ti nasao nga isport.

Imbatadna nga ammo ti anakda a pagaayatan ti amana ti taekwondo ken nagbalbalin met nga atleta iti taekwondo bayat nga adda iti elementaria ngem nagpatingga laeng ditoy ti panagbalinna nga atleta ket mamati ti inana a maysa daytoy kadagiti agserserbi nga inspirasion ti anakda.

Kunana nga addaanda ti tallo nga annak ngem ni laeng Joaquin Dominic ti naayat iti isports ken nagbalin nga atleta.

Kabayatanna, naammoan a ti nadakamat nga atleta nga ipagpanpannakkel ti Ilocos Norte ket naiyalatna ti silver medal iti Asian Taekwondo Championships itay napalabas a tawen 2022, silver medal iti pair category iti 2022 World Taekwondo Open Challenge, silver medal iti individual category ti 2022 World Martial Arts Masterships ken naruay a sabsabali pay a pammadayaw a nagun-udnan iti national ken international competition.