PGIN, nakagun-od iti dua a pammadayaw manipud DOH

Nagun-od ti Provincial Government of Ilocos Norte (PGIN), babaen iti Provincial Health Office (PHO), iti dua a pammadayaw iti “Awarding of Top Performing Facilities” para iti 2024 nga insayangkat ti Department of Health-Region I.

Inbunannag ni Provincial Health Officer Dr. Rickson Balalio a ti tema ti nasao nga aktibidad ket “Mobilizing Champions to End TB in Region I.”

Segun kenkuana, ti probinsia ket “Gold Awardee” iti “Population Screening Rate Indicator” ken “Silver Awardee” iti “Population Testing Rate Indicator.”

Mainaig iti daytoy, inpakaammona a naipaayan ti probinsia ti plaque ken certificate a nangiipanamnama ti pannakaited ti insentibo iti PHO.

Nupay kasta, imbatadna a saanna pay nga ammo ti dagup ti maipaay kadakuada nga insentibo.

Kabayatanna, inlawlawagni Dr. Balalio a ti pagsayaatan ti pannakaduktal kadagiti agsagsagaba iti sakit a Tuberculosis (TB) ket kaipapananna a napintas ti panagbiruk kadagiti apektado iti nasao a sakit.

Innayonna nga iti “Population Screening Rate Indicator” ti mangrukod ti populasyon a dumalan iti “screening” iti sakit a “TB” idinto nga iti “Population Testing Rate Indicator” ket ti bilang ti populasyon a naeksamen iti nasao a sakit, agpada a dakkel a tulong tapno naan-anay a mapaagasan dagiti adda sakitna a TB.