Tulong ti PGIN kadagiti mannalon babaen iti Agri Ka Dito, umabot iti nasursuruk ngem 10M a pisos  

Nasursurok ngem  10M a pisos ti balor dagiti naipaay a tulong kadagiti mannalon, mangngalap ken livestock raisers iti babaen ti Agri Ka Dito Program ti gobierno probinsial.

Segun kenni Gob. Matthew J. Marcos Manotoc karaman kadagiti benepisiario ket dagiti innem a pulo a taga ditoy siudad ti Laoag, sanga gasut siam a pulo ket tallo manipud iti siudad ti Batac, taga Vintar, Pagudpud, Sarrat, Vintar ken Dingras.

Inbunannagna a dagiti naibunong kadagiti benepisiario ket dagiti nakiddaw iti babaen ti nadakamat a programa ti gobierno probinsial kas iti siam a pulo ket maysa a knapsack sprayer, sangaribu tallo gasut limapulo ket tallo a sako ti organik nga abono, sangaribu tallo gasut limapulo ket tallo a foliar fertilizer, nadumaduma a bin-i a bukbukel ti natnateng, walopulo ket walo a burias, walopulo ket walo a sako ti feeds ken supplements para kadagiti taraken.

Impadanon ti gobernador ti panangnamnamana a makatulong dagiti inpaay ti gobierno probinsial. Impatalgedna ti panangtutok ti gobierno probinsial kadagiti napaut ken daddadakkel a solusion kadagiti parikot dagiti mannalon, mangngalap ken dagiti livestock raisers ditoy probinsia.

Kagiddan daytoy, ginutigot manen ni Gob. Marcos Manotoc dagiti mannalon nga agmula kadagiti High Value Crops agsipud ta nalaka ti presio ti irik idinto a nangingina ti presio dagiti kasapulan iti panagtalon.

Kunana a daytoy ti rason nga ar-aramiden ti gobierno probinsial ti amin a kabaelanna tapno maipaay dagiti kasapulan dagiti mannalon.

Inpanamnama pay ti gobernador nga ikarkarigatan ti gobierno probinsial a masolusionan ti nabayagen a problema iti irigasion ken iti pannakailako iti nasayaat a presio kadagiti produkto ditoy probinsia.

Mangnamnama a makatulong iti daytoy a problema ti pannakaiyestablisar ti cold storage facilities, pannakaisayangkat ti product processing ken ti agri-business.