Programa ti PGIN, nakatulong iti agasawa nga OFW a naapektaran iti pandemia

Binigbig ni Mr. Alladin Segundo Galano a dakkel a nakatulong dagiti programa ti Provincial Government of Ilocos Norte (PGIN) iti inrubuatda a negosio iti asawana a ni Mrs. Mylene Galano kangrunaan ti programa ni Bise Gobernador Cecilia Araneta Marcos a “Mercato ni Nanay Ces” ken ti “Producer to Consumer Program” wenno P2C.

Inlawlawagna nga immuna a naiyammo dagiti produktoda iti kangitingitan ti pandemia babaen iti programa ti bise gobernador ken ad-adda pay a naipalawa babaen iti pannakipartisiparda iti P2C.

Segun kenkuana, napanunutanda ti saanen a nagsubli idiay Qatar a nagtrabahoanda kas Overseas Filipino Workers (OFW) iti uneg ti sangapulo ket lima a tawen kalpasan a naapektaran ti sueldoda gapu iti pandemia a ginubuay ti COVID-19.

Imbatadna nga iti panagawidda ditoy Pilipinas, inkeddeng ti asawana ti napan nagadal ti kurso a “baking and pastry” idiay Manila ken iti panagawidna ditoy probinsia ket ditoy a nagaramid iti nadumaduma a produkto ket nangipasdekda iti bakeshop.

Kunana a ti asawana ti nangsursuro metten kenkuana nga ag-bake ken iti agdama ket agbinbinnuligda nga agassawa iti nadumaduma a klase ti cake ken tinapay.

Mangnamnama ni Mr. Galano nga iti tulong ti PGIN ket ad-adda pay a mapadakkel ti negosioda tapno matun-uyanda ti arapaapda a tumulong.

Naammoan a daytoy ket nagserbi a warehouseman idinto a ti asawana ket maysa a pharmacist iti kaaddada idiay Qatar.