PGIN, agaw-awaten kadagiti aplikante para iti Job Start Program

Nangrugin ti Provincial Government of Ilocos Norte (PGIN) babaen iti Public Employment Service Office (PESO) nga agawat kadagiti aplikante para iti programa a “job start program”.  Ti nasao a programa ket  pagbinnuligan ti PGIN babaen iti PESO ken ti ti Department of Labor and Employment (DOLE).

Segun kenni Mrs. Anne Marie Lizette B. Atuan, mangidadaulo iti PESO, iti pakabuklan ti rehion uno ket ti laeng Ilocos Norte ti napili a pakaipatungpalan daytoy a programa.

Inlawlawagna a ti nasao a programa ket para kadagiti awan ti pagtrabahoanna pakairamanan dagiti katurturposna iti kolehio nga interesado a mangasa wenno mangpasayaat pay iti “skills” dagitoy.

Imbatadna a ti nasao a programa ket adda dagiti addang a masurot no kasano a makastrek dagiti maseknan iti pagtrabahoan.

Segun kenkuana, maipadalan nga umuna dagiti maseknan iti “life skills training”, sumaruno ti “technical skills training” ken “internship” agingga nga adda ti pakaipanan dagitoy a pribado a kompania a nangkunpirmar a makibinnulig iti nasao a programa.

Impalgakna nga addan ti sangapulo ket lima a pribado a kompania ti nangipatalged iti pannakikammayetda iti “job start”.

Inbunannagna a kadagiti nasao a kompania ket adda ti dua gasut a pagtrabahoan nga agur-uray kadagiti nagagasat a kakailian nga interesado a makipaset iti nasao a programa.

Kuna ni Atuan a ti “life skills training” ket agpaut iti sangapulo nga aldaw, tallo a bulan iti technical skills training ken tallo a bulan nga internship sakbay a maiserrekda kadagiti agur-uray a pribado a kompania.

Innayonna a bayat ti idadalan dagiti aplikante iti training ket adda ti maipaay kadakuada a benepisio, minimum a sueldo ken allowance nga ipaay ti DOLE.