Miembro ti TODA a rehistrado ti MINC, makaawat ti MAT Pasada

Maiyun-una a maipaay dagiti uniporme kas iti long sleeve ken kallugong kadagiti kameng ti Tricycle Operators and Drivers Association (TODA) a rehistrado iti Metro Ilocos Norte Council (MINC) sakbay a maited ti tulong pinansial kadakuada kas naipalaon iti programa a Manayon A Tulong wenno MAT Pasada.

Segun kenni Atty. Athena Nicolette “Nikki” Pilar, Officer In-Charge ti MINC a daytoy ket agsipud ta napintas a kitkitaen a nakauniporme amin dagiti maseknan bayat ti pannakaipaay ti tulong kadakuada manipud iti probinsia.

Malaksid iti daytoy, impalgakna a mailawlawag pay kadagiti maseknan apaman a maawatda dagiti unipormeda a maipakaammonto kadakuada no kaano ti pannakaawatda iti tulong pinansial a para kadakuada.

Mainaig iti daytoy, imbatadna a no adda man dagiti saan a makaammo a kameng ti TODA ket dagiti saan pay a nakaawat iti unipormeda.  Mamati a dagiti agrekreklamo iti kaawan ti naawatda a tulong pinansial ket dagitoy dagiti saan pay a nakaala iti unipormeda.

Segun kenkuana, mabalin a paneknekan dagiti lider dagiti TODA ken dagiti nakaawaten ti unipormeda a nailawlawag a naimbag dagitoy kadakuada.

Nupay kasta, impasigurado ni Pilar a saan a napukaw ti pundo ken impasiguradona a makaawat amin a kameng ti TODA iti nadumaduma nga LGU ditoy probinsia a rehistrado ti MINC ti MAT Pasada a tallo ribu a pisos.

Kunana nga iyuray laeng dagiti maseknan ti pannakaawatda agsipud ta saan met a mapaggigiddan ti MINC ti agturong kadagiti nadumaduma nga ili wenno siudad ditoy probinsia.