Inagurasion ti kabaruan a Sub-port ti Bureau of Customs iti Laoag, naisayangkat iti Laoag International Airport

Naisayangkat ti ribbon cutting ken office blessing ti kabaruan a sub-port ti Bureau of Customs wenno BOC iti Laoag City, idi Martes, Agosto 08.

Indauluan ni Bureau of Customs Commissioner Bienvenido Y. Rubio ti nasao nga inagurasion, a naisayangkat iti Laoag International Airport, kaduana ni Ilocos Norte Governor Matthew Marcos Manotoc. Ti nasao a sub-port ket naipasidong iti Bureau of Customs-Port of Aparri, nga agserbi kas “mother port” ti nadakamat a sub-port.

Ti Sub-port of Laoag ket iso ti kaunaan a sub-port a naipasdek iti nadakamat a ciudad. Mainaig kadaytoy, ti nadakamat a sub-port, ket maibilang kas maikadua a sub-port iti intero a probinsia ti Ilocos Norte, malaksid ti Sub-port of Currimao, ken ti maikatlo a sub-port kadagiti lima a sub-port ti Bureau of Customs-Port of Aparri, malaksid iti Sub-port of Irene iti ili ti Cagayan.

Agserbi ti nadakamat a sub-port kas wagas tapno ad-adda pay a mapapigsa ti panagkolektar ti buwis ti Bureau of Customs para kadagiti sumrek a produkto ditoy probinsia, pakairamanan pay dagiti kabangibang a probinsia, kas iti Ilocos Sur ken ti Cagayan.

Bayat ti panagbitla ni Bureau of Customs Commissioner Rubio, inpannakel na nga immaboten ti P1.4 a bilyon ti nakolektar ti Bureau of Customs-Port of Aparri, sipud pay idi Enero 2023 agingga iti agdama a bulan.

Nalaos ti panagyaman ni Governor Marcos Manotoc iti Bureau of Customs nga idadauluan ni Commissioner Rubio, gapo ta ti panaglukat ti kabaruan a sub-port iti probinsia, ket makatulong tapno mapapigsa ken mapaado pay dagiti aglukat a negosyo. Innayona a babaen kadaytoy, ket umado met dagiti panggedan a mabalin a gundawayan dagiti kaprobinsiaan.

Mainaig kadaytoy, dagiti nadakamat a sub-ports ket addaan ti international trade potential, nu sadino a dagiti produkto nga aggapo kadagiti probinsia ti Ilocos Norte, Ilocos Sur, ken Cagayan, ket mabalin a maibiahe kadagiti pagilian kas iti South Korea, China, Japan, ken Taiwan.

Manamnama a babaen ti panaglukat ti baro a sub-port ket ad-adda a mapasingked ti arapaap ti gobierno probinsial a mapagbalin ti probinsia ti Ilocos Norte kas ‘gateway’ iti East Asia.

Malaksid iti BOC Commissioner ken ti gobernador ti probinsia, nakipagpaset pay iti nasao nga inagurasion da Ilocos Norte Vice Governor Cecilia Araneta Marcos, Governor Elias C. Bulut Jr. ti Provincial Government of Apayao, Ilocos Norte First District Representative Congressman Ferdinand Alexander Marcos III, Ilocos Norte Second District Representative Congressman Angelo Marcos Barba, District Collector Elenita Abaño ti Bureau of Customs- Port of Aparri, Currimao Mayor Edward Quillala, Paoay Mayor Shiella Galano nga inbagian ni Mr. Jesse Galano, City of Batac Mayor Albert Chua, ken dadduma pay a bisita ken stakeholders.