Cash For Work, Barangay Ranger Officers naipasigurado nga agtultuloy

Naawaten dagiti 141 a Barangay Ranger Officer wenno BRO ken 41 a benepisiario ti Cash For Work ti sueldoda idi June 29.

Inpakaammo ni Gob. Matthew Marcos Manotoc a Php 3,000.00 ti naawat ti tunggal maysa a benepisiario.

Mainaig iti daytoy, imbatadna nga immabot iti nasursurok ngem Php 500,000.00 ti naipaay a sueldo kadagiti maseknan.

Kunana a karaman kadagiti benepisiario nga immawat iti sueldoda ket dagiti taga Brgy. Abaca, Bangui, benepisiario ti Cash For Work, ken dagiti BRO a taga Brgy. Catangraran, Brgy. Manarpac, Brgy. Maan-anteng iti ili a Solsona, Brgy. Uguis, Nueva Era, Brgy. Caruan ken Brgy. Davila ti ili a Pasuquin ken Brgy. Saguigui, Pagudpud.

Inlawlawag ti gobernador nga agtultuloy dagiti nasao a programa iti Provincial Government of Ilocos Norte wenno PGIN gapu iti kinapateg dagitoy a programa.

Impalgakna a nakadakdakkel dagitoy a tulong iti pannakasaluad ti aglawlaw ken kangrunaanna, dakkel a tulong iti pamilia dagiti kakailian.

Inbunannagna a kas gobernador iti probinsia ket nakapatpateg kenkuana iti kaadda ti uray sangkabassit a pamastrekan dagiti kakailian nga agserbi iti pamilia dagiti maseknan.

Impasiguradona ti panangaramidna ti amin a kabaelanna ken ti sibubukel a gobierno probinsial para iti pagsayaatan dagiti amin a kakailian.