Responsable a panagusar iti contraceptive, mailunglungalong a maisuro kadagiti agtutubo 

Inannugot ni Gobernador Matthew Marcos Manotoc a maysa daytoy kadagiti mangitantandudu iti pannakaibunong dagiti “contraceptives.”

Inlawlawagna a daytoy ket saan laeng a tapno malapdan ti panagsikog ngem kangrunaanna iti pannakasaluad ti salun-at dagiti kakailian nangnangruna ket umad-adu ti kaso ti HIV ken AIDS.

Malaksid iti daytoy, inbunannagni Gob. Marcos Manotoc a basar iti kaudian a listaan ti “teenage pregnancy” wenno dagiti nagsisikog nga ubbing ditoy probinsia iti umuna a tallo a bulan iti agdama a tawen ket immaboten ti bilang dagitoy iti 122.

Kuna ti gobernador, para kenkuana ket maibilang daytoy a krisis agsipud ta saan laeng a dagiti maseknan ti maapektaran ngem ti sibubukel a pamilia dagiti maseknan ken mainayon payen dagiti nakasikog kadakuada ken ti pamiliada pakairamanan dagiti maipasngay a maladaga.

Impalgakna nga iti agdama, addan ti paglintegan nga inpasa ti gobierno nasional mainaig iti panagusar iti contraceptive.

Mainaig iti daytoy, mamati ti gobernador a panawenen tapno maisuro kadagiti ubbing ti responsable a panagusar iti daytoy.

Innayonna a ti pannakaiyammo wenno pannakaiyadal iti “sex education” ket saan a maikonsiderar a nakababain wenno maikontra iti pagannurutan ti simbaan katolika gapu ta mismo payen a ti “pope” ken ti “Vatican” ket silulukaten iti daytoy a banag pakairamanan ti diborsio wenno panagsina dagiti agasawa.