PGIN, mangiyuswat ti job fair ita nga Abril

Manamnama a makipaset iti masungad a “job fair” dagiti amin nga employers ditoy probinsia a “partner” wenno kabinbinnulig ti Provincial Government of Ilocos Norte (PGIN) kadagiti nadumaduma a programa.

Inbunannag ni Ms. Anne Marie Lizette B. Atuan, mangidadaulo ti Public Employment Service Office (PESO) ti PGIN a maisayangkat ti nasao nga aktibidad iti masungad nga Abril 20 iti auditorium ti kapitolio probinsial.  

Imbatadna a malaksid kadagiti pribado a kompania ket makipartisipar pay dagiti nadumaduma a national government agencies.

Kunana nga agpapan itay napalabas a lawas ket addan ti siyam nga ahensia ti gobierno a nangkunpirmar iti pannakipasetda iti nasao nga aktibida.

Inlawlawagna a puntiria ti probinsia a mamentenar ti kaadu dagiti maala a “hired on the spot” wenno HOTS iti maisayangkat a “job fair” nangnangruna ket napadayawan ti PESO ti probinsia a kaaddoan ti “HOTS” kadagupan dagiti maisaysayangkat a job fair ditoy rehion uno.

Mainaig iti daytoy, inbunannag ni Ms. Atuan a dagiti kangrunaan a kompania a makipaset iti nasao nga aktibidad ket dagiti mangisayangkat ti “urgent hiring” wenno dagiti agkasapulan unay iti empleado.

Pakaseknan daytoy, inyawisna kadagiti kakailian nga agbirbiruk ti pagtrabahoan nga agisagana iti naruay a “resume” ken masapul nga isagana dagitoy dagiti amin a credential-da amangan no karaman dagitoy kadagiti mapagasatan a “hired on the spot” iti nasao a “job fair”.

Innayonna a malaksid iti nasao a “job fair” nga iyuswat ti probinsia ket makikammayet to manen dagitoy iti iyuswat ti Department of Labor and Employment a maiyasping nga aktibidad intono Mayo uno (1) a “Labor Day” wenno kaaldawan dagiti mangmanggged a maiyuswat iti Robinsons Mall ti ili a San Nicolas.