Mapukpukaw a mangngalap manipod Pasuquin, nasarakan ken nakaawiden iti pagtaenganda

Nasarakanen ken nakaawiden iti pagtaenganda iti Brgy. Davila, Pasuquin, ti maysa a mangngalap, idi Biernes, Agosto 11.

Nagbalin nga emosional ni Alvin Mabini Plasos, agtawen ti 23, baro, ken agnanaed iti Brgy. Davila, Pasuquin, kalpasan a naka-awiden daytoy iti pagtaenganda, babaen iti tulong ti Municipal Government of Pasuquin ken ti Provincial Government of Ilocos Norte.

Bayat iti panangibinglayna iti kapadasana sakbay a naisalakan daytoy, ket saana nagawidan iti panagsangitna. Segun kenkuana, nagturong da kadagiti kakaduana a mangngalap iti taaw kas convoy idi Agosto 02, Mierkules, iti oras ti alas tres ti parbangon. Ngem gapo ti saan a napakadaan a pasamak, nadadael ti sungo ti bilog a nagluganana, rason no apay a timmaob daytoy.

Innayona nga inggalotna iti bagina ti tali ti bilogna, ken nagkatang-katang daytoy iti uneg ti maysa nga aldaw. Kalpasana ket naglangoy daytoy iti kaadayo a halos lima a milya, sakbay a naisadsad isona iti maysa nga “uninhabited island” it paset ti Calayan, iti ili ti Cagayan. 

Bayat iti panagtalinaedna iti nasao nga isla, ket dagiti laeng bunga ti kayo a salaysay ti kinkinnana, ken ti danom manipod kadagiti naiyanod a “bottled water” iti nasao nga isla ti inininomna. Inpakitana pay ti maysa a “rubber mat” a nasarakana met laeng iti isla, nga iso ti nagserbi kas pannaka-ikkamena, ken linongna no agtudo.

Segun ken ni Plasos, ket nakitana dagiti aglabas-labas a “choppers/helicopters” ken barko dagiti rescuers, ngem gapo ti kaadayo ti distansya iti nagbaetana ken dagiti rescuers, ket saanda a nakita isona. Kalpasan ti halos makalawas a panagtalinaedna iti nasao nga isla ket nakita iso na dagiti mangngalap manipod iti Dalupiri/Fuga Island, Cagayan, idi malem ti Huebes, Agosto 10.

Napan intulod dagiti nasao a mangngalap ni Plasos iti ili ti Claveria, nga iso iti napan nangsunduan kanyana dagiti sumagmamano a kameng ti gobierno munisipal ti Pasuquin. Napalaos ti panagyamana kadagiti amin a timmulong kanyana a makasubli iti sidong ti pamilyana, gapo ta adda iti kabsatna a pagbasbasaena ken gapo iti iliw a nariknana bayat ti pannakaisinana kanyada.

Nangipaay ti gobierno munisipal ti Pasuquin ti pinansial a tulong para kenkuana, idinto a nangipaay ti food packs, hygiene packs, ken dadduma pay a food items ti gobierno probinsial.