Barangay Nutrition Scholars, inpaayan ti PGIN ti tulong

Umabot iti dua punto dua a milion a pisos ti tulong nga inpaay ti gobierno probinsial ti Ilocos Norte kadagiti amin a Barangay Nutrition Scholars iti intero a probinsia.

Indauloan ni Gob. Matthew J. Marcos Manotoc ti pannakaipaay ti tulong kadagiti pito gasut duapulo ket tallo (723) a Barang Local Government Units wenno LGU’s ditoy Ilocos Norte.

Segun iti gobernador, immawat ti tunggal maysa a iti tallo ribu a pisos kabayatan ti “Distribution of Assistance to Barangay Nutrition Scholars” iti Ilocos Norte Centennial Arena.

Mainaig iti daytoy, inbunannagna a kalikagumna a manayunan ti maipapaay a tulong kadagitoy.

Binigbig ni Gob. Marcos Manotoc a nakapatpateg ti ar-aramiden dagitoy kangrunaanna iti panangisigurado dagitoy a nasalun-at ti masakbayan ti probinsia.

Impalgakna a babaen kadagitoy ket maipapaayan ti umiso a taraon dagiti ubbing ken tumultulongda iti panagbalin a nasalun-at dagiti ubbing para iti pannakaisagana dagitoy iti nasayaat a masakbayan.

Pakaseknan daytoy, impadanonna ti napalaus a panagyamanna kadagiti BNS ditoy probinsia.

Kunana a babaen kadakuada ket sumaysayaaten ti “nutrition statistics” ti probinsia.

Mainaig iti daytoy, impatalgedna nga agtultuloy ti panangipaay ti PGIN ti suporta kadakuada ken kas gobernador ti probinsia kalikagumna a masigurado a maipaay dagiti masapsapulda iti panangannongda iti responsibilidadda pakairamanan ti naan-anay a kompensasion